Mənim ata babam Iskəndər Əli oglu Əliyev (1906 – 1972)

Azərbaycanın SSR-nin ən gənc nazirlərindən biri və SSRİ Ali Sovetinin 1-ci çağırışının deputatı olmuşdur.

1906 –cı ildə Şuşa şəhərinin Mamayı məhəlləsində anadan olmuşdur. O anadan olan il əvvəl atası vəfat edir, az keçmədən isə anası da dünyasını dəyişir.

Babası Zeynal Mamayi məhəlləsində məscid və pir tikdirdiyinə görə Şuşada tanınan və sayılan insanlardan olub. İskəndər imkanlı ailənin övladı olmasına baxmayaraq 1918-ci ildə ermənilər Qarabağda qətliamlar törədən zaman qardaşlarını və yaxın qohumlarını itirir və buna görə Goranboyda bir varlı torpaq sahibinin yanında muzdur kimi işləməli olur. Yalnız 1925-ci ildə 18 yaşında qardaşlarını və yaxın qohumlarını tapıb onlara qovuşa bilir.

1926-cıildə Gəncə stansiyasının deposunda çilingər kimi işləməyə başlayır.Burada özünü fəal ictimaiyyətçi kimi göstərir.

1928-ci ildə Gəncə deposunun yerli komitəsinə məsul katib seçilir.

1930-cu ildə Bakıya köçür, Ali Xalq Təsərrüfatı Sovetində təlimatçı, əmək ixtiraçılığı mərkəzi bürosunun sədri, istehsalat texniki təbliğat sektorunun rəisi vəzifələrində çalışır.

Bu dövrdə Azərbaycan QBİİ yanında işçi fakültəsində təhsilini davam etdirir.

1931-ci ildə Pəri Həsənzadə ilə ailə həyatı qurur. Pəri Həsənzadə 1923-1926-ci illərdə Azərbaycan Yerli Müsavat Partiyasının başkanı olmuş doktor Dadaş Həsənzadənin (Həsənovun) bacısıdır. Bu izdivacdan onların 1 qız və 2 oğlan ovladı olmuşdur.

1933-cü ildə Ümümittifaq Dövlət Pambıq Satışı İdarəsinin (Soyuzxlopkosbıt) Azərbaycan şöbəsinin müdiri təyin olunur.

1933-34-cü illərdə Moskvada yüngül sənaye nazirliyinin rəhbər işçilərinin ixtisasartırma kurslarını bitirir.

1936-cı ildə SSRI Ali Sovetinin Birinci Cağırışının deputatı seçilir.

1937-ci ildə əvvəl Xalq Yüngül Sənaye Komissarının (Nazirinin) müavini vəzifəsinə daha sonra Xalq Yüngül Sənaye Komissarı (Naziri) vəzifəsinə təyin olunur.
1938-ci ilin əvvəlində həbs olunur və Moskvanın Butırka həbsxanasında saxlanılır.

1939-cu ilin aprelində Moskvadan Bakıya gətirilir, 1942-ci ilin mayında Şimali Qazaxstana sürgün olunur. 1955-ci ilə qədər orada Karaganda vilayətinin Yegindi-Bulak qəsəbəsinin Koyandin Maşın-Traktor Stansiyasında (MTS) sürgün həyatı yaşayır. Orada həmdə aqronom vəzifəsində işləmişdir.

1955-ci ildə Sovet Höküməti tərəfindən tam bəraət alır və 1955-ci ilin noyabrında 18 illik sürgün həyatından sonra Bakıya dönür.

1956-cı ildə Azərbaycan SSR Meyvə-Tərəvəz Təsərrüfatı Komitəsiinin (Azplodovoşprom) sədri vəzifəsinə təyin olunur.

1959-cu ildən təqaüdə çıxana qədər Azərbaycan SSR Zərgərlik Malları Ticarəti Komitəsinin (Azerbyuvelirtorq) sədri vəzifəsində çalışır.

1964-cü ildə təqaüdə çıxır. Respublukanın fəxri təqaüdçüsü idi.

İskəndər Əli oğlu Əliyev 1972-ci ilin dekabr ayında Bakı şəhərində vəfat etmişdir.

Uşaqları:

Əliyeva (Məmmədova) Rəna İskəndər qızı (1932-nci ildə Bakıda anadan olmuşdur) - Tibb Elmləri Namizədidir. Hazırda Türkiyədə yaşayır.

Əliyev Fuad İskəndər oğlu (1935- 1953) - Tibb Universitetinə qəbul imtahanları zamanı yatalaq xəstəliyindən vəfat etmışdir.

Əliyev Arif İskəndər oğlu (1937-1988) – iqtisadçı idi. 1988-ci ilin oktyabr ayında qəflətən vəfat etmişdir.

 

İsgəndər Əliyevin 1930-cu illərdə çəkdirdiyi şəkili.

 

SSRİ Ali Sovetinin I çağırış deputatları (Millətlər palatası). Azərbaycanlı deputat İskəndər Əliyev 3-cü cərgədə soldan birincidir. Birinci cərgədə Sovet İttifaqının başçılarıdır: Beriya, Mikoyan, Andreev, Molotov, Kalinin, Voroşilov, Stalin, Kaqanoviç, Yejov, Şvernik.

 

İsgəndər Əliyev reabilitasiyadan sonra başqa bəraət qazananlarla birlikdə (soldan birincidir).

 

İsgəndər Əliyev oğlu Ariflə Soçidə, 1958 il.